Sgarfe

Cjarnie, tiare mitiche di un videozûc

Cirint cualchi biel zugut (di chei a gratis) pal gno gnûf telefonut o ài scuviert chest titul une vore cognossût e preseât: Inotia 3: Children of Carnia.
Disponibil dome par inglês, il zûc si lu cjate tes versions par iOS (iPhone, iPod e iPad) e par Android, al è un RPG in stîl manga, ven a stai un zûc di rûl di spadis, strions e besteatis imagjinaris cun combatiments tal stîl de schirie di Final Fantasy.
A cualchi programadôr de tiare dal Soreli Jevât il non “Carnia” al à sunât ben par une ambientazion fantasy. Visaitnus se o cjatais cualchi corispuindince cu la Cjarnie chê vere!

Culì i link par discjamâ il zûc: Android e iPhone/iPod/iPad. Bon divertiment!
Inotia 3

Ise juste chê pronuncie?

Forvo
A voltis nus capite di no savê cemût pronunciâ ben une peraule intune lenghe foreste, o sintìn par television une pronuncie che no nus sune tant juste. La soluzion al è un sît come Forvo, dulà che si cjatin plui di un milion di pronunciis par 268 lenghis. Lis pronunciis a vegnin dai utents regjistrâts che a puedin zontâ ancje lis peraulis che no son (al è propite specificât che ancje lis brutis peraulis a mertin un puestut). E la robe plui interessante e je che cuant che un si regjistre al met ancje di dulà che al è, cussì di permeti di confrontâ i acents dai puescj. Chest po al podarès jessi ancjemò plui interessant par une lenghe come il furlan, dulà che si cjatin un grum di acents diviers, un plui biel di chel altri.

I autôrs dal sît a àn za proviodût une sezion pal furlan, che par dî la veretât e je par cumò a vonde puare, ma sperìn che cul timp si slargjedi. Jo il mê piçul contribût lu ai dât!

Locâl globâl pe Scozie

Sgarfe

Lis elezions scozesis a son stadis di pôc, cu la vitorie dal SNP (Scottish National Party) che al à concuistât la maiorance asolude tal Parlament (te foto in bande, la aule). Une curiositât a proposit dal Parlament Scozês (fat bon di resint intal 2003) e je che il so sît al è fat in ce tantis lenghis, ancje par talian. In spiete dal furlan, si pues visitâlu cussì.

Us an robade la machine fotografiche? Cirîtle on line

Sgarfe

Se us an robât la machine fotografiche, cumò o vês la pussibilitât di rivâ adore a recuperâle in gracie de rêt, se il lari al met on line cualchi foto fate cun jê. Lait li di Stolen camera finder, cjamait une foto che o vês fat in passât e se sul web a ‘nd son di scatadis cu la stesse fotocjamare us al mostrarà (ogni foto e je timbrade cun i “dâts exif” e se il lari no ju scancele o rivais a cjatâlis). Via paroleaapiccicate.