Apel pal messâl

Gnovis

Nol centre cu digjitâl, ma us proponìn vulintîr chest anunci par cjtâsi fûr dal virtuâl almancul inte ocasions de Fieste dai Patrons dal Friûl Macôr e Fortunât.

A ducj chei che i tegnin a la identitât e ai derits dal Popul Furlan

O sês invidâts di cûr a partecipâ al presidi che al sarà Martars ai 12 di Lui dal 2011, Fieste dai Patrons dal Friûl Macôr e Furtunât tacant des 6.30 di daspomisdì (18.30) indevant te Place dal Cjapitul, denant de Basiliche patriarcjâl di Aquilee par domandâ che la CEI (Conference dai vescui talians) e fasi bon il messâl roman in lenghe furlane, che al è in spiete di agns.
Chest apel, che Us domandìn di slargjâlu a plui int pussibil, al è par cui che al crôt e par cui che nol crôt, parcè che Aquilee e la sô tradizion a son patrimoni di dute la umanitât e fonde de unitât dal Friûl.
Par cjaminâ cul cjâf alt e podêsi ancjemò clamâ “Popul”.

“Furlan Nestre Lenghe Vive”
Comitât apartitic e aconfessionâl di citadins pe identitât dal FriûlCun agrât
Il puartevôs
av. Luca Campanotto

Locâl globâl pe Scozie

Sgarfe

Lis elezions scozesis a son stadis di pôc, cu la vitorie dal SNP (Scottish National Party) che al à concuistât la maiorance asolude tal Parlament (te foto in bande, la aule). Une curiositât a proposit dal Parlament Scozês (fat bon di resint intal 2003) e je che il so sît al è fat in ce tantis lenghis, ancje par talian. In spiete dal furlan, si pues visitâlu cussì.

Patrie a Glemone

Gnovis

Par une volte no us segnalìn un alc di digjitâl, ma dal mont “reâl”: il Comun di Glemone al da acet ae presentazion dal numar di Mai dal mensîl “La Patrie dal Friûl”, lunis ai 30 di Mai aes 20.30, te ex glesie di Sant Michêl. Ducj a son invidâts, si podarà sore nuie vê l’ultim numar de Patrie di cerce e si podarà fâ l’abonament a presit promozionâl

Furlan… inulât li dal Osmer

  Gnovis

Voleiso savê ce timp che al fasarà doman in te Regjon Friûl – Vignesie Julie?
Probabilmentri la miôr robe di fâ al è consultâ il sît dal OSMER, che fra l’altri, al volte lis previsions par Sloven, Todesc, Inglês e Furlan.
Chest al è il leam a la pagjine par Furlan, che us vevin zà segnalât.
Il probleme però al è che al è zâ plui di un mês la pagjine in lenghe furlane no funzione plui! O vin sintût che a son daûr a rinovâ l’apalt de traduzion… Spetìn fidançôs alore, e magari provìn a lei lis previsions par Sloven, che si impare simpri alc di gnûf!

On line alc de Patrie di Mai

Patrie on line

Il numar di Mai rivât a cjase dai abonâts al propon in cuviertine la tierce pontade de “Cuintristorie dal Nûfcent” di Agnul Floramo dedicade al deceni de auge dal fassisim (1930-40).
Il numar si vierç fevelant di imigrazion cuntune interviste a bons. Gloazzo de Caritas di Udin.
Si va indevant fevelant dal suces de leture continue de Bibie, di Cjargne, dal inovâl dediaât a bons. Faidutti, grant furlanist dal Friûl di Soreli Jevât e, tes pagjinis internazionâls, un ricuart di Bobby Sands.
E dongje diviers aprofondiments su la situazion dal Friûl, a continuin ancje lis nestris pagjinis di “Furlans, digjitait furlan”.
La Patrie dal Friûl si pues ricevi in abonament o cjatâ tes miôr librariis, ma ancje lei su internet: www.lapatriedalfriul.org.